خطة تشخيص و علاج كورونا المستجد covid19 في المشافي الالمانية . للدكتورة هند النقولا. المانيا

 راح احكي من خلال تجربتي المتواضعه و الصغيرة و بلكي هالحكي يساعد و لو نتفة بهالايام الصعبة اول شي الڤيروس خطير و جديد و ما اله قواعد. كيف ما اله قواعد ؟ يعني عم يجي بأعراض مختلفه و مش كل المرضى مثلا عملوا حراره او سعال جاف و في عائلات اتدمرت نهائيا ( عائلتين لبنانيات اول عائلة راحوا اربعة و تاني عائلة راحوا تلاتة) بسببه و حاليا عم يجينا عائلات كاملة ع المشفى ، و عند بعض الناس مر مرور الكرام ليش ما حدا بيعرف بس اكيد في شي جيني .   تاني شي كلنا معرضين للاصابة ، كرمال هيك أفضل شي كل حدا يعمل كل اساليب الوقاية  و يتكل ع ربه ( اعقل و توكل ) تالت شي بس حسيت انه عندك اعراض مباشره عزل (اذا مو خايف ع حالك خاف ع اهلك) و بنصح الكل حتى لو كانت اعراضك خفيفه مرتين على الاقل تحاليل دموية خلال مرحلة المرض ( عم احكي من اللي شفته)، بعرف الوضع الاقتصادي كيف بالبلد بس اللي بيقدر لازم يعملهم ، السبب في ناس كان ماشي المرض بأعراض خفيفة جدا و فجأة للاسف رحلوا عن هالدني . مش عم أحكي هيك لخوفكم او عم بالغ ، هاد الوضع الحالي مشان العلاج يمكن هلأ الحكي موجه اكتر للاطباء و خاصه اللي بسوريا بلكي يكون منه فائده و لو محدوده ( البحصة بتسند جره)   راح اكتب طريقه العلاج اللي عم نتبعها بالمشفى عنا و عم احكي بس عن مرضى الشعبة العادية مش مرضى العنايه المركزه ، انا الصراحة ما اشتغلت بالعناية فكرمال هيك ما فيني اعطي رأي او فيد بشي اهم التحاليل المطلوبه للمريض في حال الشك بالاصابه مسحة ، صوره صدر ثانيا تحاليل دمويه :  صوره دم مفصلة D-Dimer , procalcitonin, CRP, بالاضافة وظائف الكلى ، وظائف الكبد العلاج : باراسيتامول كمسكن الم و خافض حراره مننصح كل المرضى يكتروا سوائل لان عم يفقدوها مع الحراره اي ارتفاع لD-Dimer عن الحد الطبيعي منعطي Clexane بجرعه علاجيه مش وقائيه مرتين باليوم و حسب وزن الجسم و من الاسبوع الماضي ضفنا عليه الاسبرين بجرعه 100mg مره باليوم . اذا كان D-Dimer طبيعي منعطي Clexane جرعه وقائيه يعني 0.4 مره باليوم يمكن حدا يسأل ليش كل هالقد الجواب المرضى اذا ما راحوا بنقص الاكسجه عم يروحوا بصمات رئوية او قلبية ، او عم يعملوا DIC و عم يدخلوا بقصور أعضاء كامل اذا ال Procalcitonin مرتفع منعطي مضادات الالتهاب لان بكون صار في اصابة ثانوية جرثومية اذا كان ال Procalcitonin طبيعي ابدا ما منعطي دوا التهاب  اه نسيت زرع الدم في حال ارتفعت الحراره عن 38.5 او شفنا اعراض ال SIRS . اي نقص بالاكسجين عن 94%  بجو الغرفه بيحتاج اكسجه و بالاضافه للاكسجين منعطي dexametazon  6mg مره باليوم و لمدة عشرة أيام . CT ابدا مش شرط هاد بالمراكز الكبيره عم يستخدم بدل صوره الصدر و يعتمدوا عليه كوسيلة تشخيصيه صوره الصدر يفضل تنعمل مرتين ، مره وقت يدخل المريض ع المشفى و مره قبل ما يطلع او كمراقبة اثناء الاقامه. الڤيتامينات .راح قول مش غلط بس ما عملت شي على سير المرض ( عليق الغاره خساره ) المضاد الڤيروسي الشهير Remedisivir مبارح20.11.2020  منظمة الصحة العالميةشالته من خطة العلاج فما أثبت انه اله تأثير على سير المرض و لا قلل نسبة الوفيات بل ع العكس ذكروا كتير اضرار صارت بسببه و منها نقص اكسجه ما بدنا ننسى كمان مراقبة السكر و خاصة عند المرضى المعتمدين ع الانسولين لان لازم تنرفع الجرعة تماما متل وقت العلاج بالكورتيزون بيتطلب الجسم جرعات اعلى من الانسولين . الدراسات عم تقول انه زاد مقاومة خلايا الجسم للانسولين . و طبعا مراقبه الامراض المزمنه الموجوده اصلا عند المريض .